MIDANG CUNG ZONG AH VA TUAH VE

"Mi nih kan cungah tuah hna seh ti nan duh bantuk khan midang cung zong ah va tuah ve u; hihi Moses Nawlbia le profet hna cawnpiaknak an sullam cu a si" (Matthai 7:12).

Kan Baibal cacang hi Sui Phunglam tiin Sunday School kan kai lio te in kan rak theih lengmang mi kha a si. Hi cacang hi a tawi ngai nain Khrihfami kan nunnak ah a biapi tukmi a si caah hun i ruah ti than ding in ka hun i thimnak a si. Hi cacang he pehtlai in phunhnih in kalpi khawh a si hnga. A thatnak lei in kalpi khawh a si bantuk in a thatlonak lei zong in kalpi sual khawh a si.

Pakhatnak ah, a thatlonak lei in kan kalpi tawnning le kalpi sual a fawining kha hun chim ka duh. Phundang in chim ah cun, kan tuah lo awk a simi tiah ka ruah ve mi ka hun langhter lai.

1. Tlangvalpa a um hnga. Cu tlangvalpa nih cun ngaknu pakhat kha a duh tuk i cu nu nih cun hei ka hnam sehlaw ti a duh ngai hnga. Cu tikah Jesuh nih pei kan cungah tuah hna seh ti nan duhmi midang cungah va tuah ve u a kan ti kha tiin ngaknu nu cu va hnam seh law, an buai kho. Cu bantuk phun a simi thil tuah sual a fawi te. Khattelei minung sining le duhnak ruah chih lengmang a hau.

2. Nihin kan vawlei nih a kalpi mi a si ruangah mah bing in um kha uar chin lengmang a si. Cu caah mi cheukhat nih cun hawidang nih hna an kan hnawh sual lai ti an phang. Hna ka hnawh hna hlah seh ti an duh. Cu caah, hna ka hnawh ve hna hlah sehlaw hna ka hnawh ve hna lai lo ti a fawite. Laimi nih nihin ni ah kan buai ngaimi cu hnahnawh a si. Hnahnawh ti tikah hi ka ah ka chim duhmi cu bawmhhal kha a si. Laitlang i a ummi kan unau nih kan bawm hna seh tiin an kan orh. Hnahnawh ngaimi kan si hna. Cu tikah ruah sual a fawimi cu hna ka hnawh ve hna lai lo hna ka hnawh ve hna hlah seh tihi a si.

3. Midang nih pehtlaihnak ka ngei hna hlah sehlaw pehtlaihnak ka tuah ve hna lai lo. Keimah um te in ka um lai ti a fawite. Ruah setsai lo ahcun a tha hnikmi a lo nain, ruah ngaingai ah cu thil tha cu a si lo. A bikin, Laimi cu mibu ah a ummi, mibu lungput kan ngei i cu caah hi lungput kan sinah a luh ve lo dingah i zuam hna u sih.

4. Midang nih ka bawm hna hlah seh, ka bawm ve hna lai lo ti zong a fawi. Ka hawi pakhat sinin ka theih balmi cu ahohmanh nih ka bawm hna hlah seh, an ka bawmh ahcun an mithmai zoh a hau sual lai ti a si. A hmaan ngai ko. Mi nih an kan bawmh tikah an mithmai zoh a hau lengmang. Nain, cu lungput nih cun midang zong ka bawm ve hna lai lo ti lei ah a kan hruai sual lai ti phan a um. Mi nih ka cungah tuah hna hlah seh ti na duh bantuk in midang cung zong ah va tuah ve hlah ti a si hnga. Cu nih cun thil tha lo a chuahter khawh. Kan Bawipa nih cun a tuah lei a kan fial deuh tawn.

Pahnihnak ah a thatnak leiin hman tawnning kha hun chim ka duh. Phundang in chim ahcun, kan herh ngaimi le kan tuah awk a simi tiah ka ruah vemi ka hun langhter lai.

1. Mi nih ka thangchiat hna hlah seh ti kan duh bantuk in midang thangchiat ve lo ding a biapi. Miphun dang kong cu kan chim lai lo. Laimi hi mi kong ceih a duh ngaimi, mi thangchiat a hmang ngaimi kan si tawn hi a poi ngai. Mi thangchiatnak chim ah kan i nuam kho tuk. Kan kaa a thaw tuk. Cu caah, mi nih ka thangchiat hna hlah seh ti duh ve ahcun midang thangchiat ve lo bak ding a si. Hihi tei khawhnak ahcun midang thatnak hmupiak i zuam kan hau.

2. Kan thatnak kan hmu hna seh ti kan duh tuk bantuk in midang thil ti khawhnak le thatnak hmuh piak thiam ve kan hau. Hihi kan herh tukmi a si. Midang nih an tuahmi thatnak kan hmuh khawh, a lawmhpi zia kan thiam hna ahcun cu nih cun kan miphun tampi a kan sersiam lai tiah ka zumh. Mi thatnak chim duh tung lo, thangthat hman tung lo, hmuhpiak zong i timh tung loin midang nih a tha ka ti hna seh ti cu thil hman lo ngai a si. Ruah ngaingai kan hau.

3. Midang nih thla ka campiak tawn hna seh ti kan duh bantuk in midang caah thla a cam tawnmi kan si a hau. Cucu Bawipa duhning zong a si hrimhrim lai. Aho hmanh nih thlacam piak cu kan duh dih. Midang zong nan thlacamnak ah ka thei tawn u, kan ti tawn hna. A tha tukmi a si. Cu bantuk te cun Khrihfami nih cun midang caah thluachuah a hal tawn tu kan si ve awk a si.

4. Mi nih ka riantuannak le a dangdang ah ka bawm hna seh ti kan duh bantuk in midang kan bawmh ve hna awk a si. Bawmhmi si nakin bawmtu si a tha deuh. Kan duh cio mi zong a si. Bawmhmi si cu hmai a hngal lo tuk. Cu caah, midang bawm khotu dirhmun kan um lioah kan ngeihmi caantha (opportunity) kha hmang thiam hna u sih. Kan duh caan paoh ah midang bawmh khawh a si lo. Kan zawn a phanh lawng ah bawmh khawh a si. Cu caah, mi nih kan cungah bawmhnak tuah hna seh ti kan duh bantuk tein midang cung zong ah tuah i zuam ve hna u sih.

5. Mi nih ka daw hna seh ti kan duh bantuk in midang a dawtu si ve kan hau. Dawtmi si cu kan duh ciomi a si. Dawtmi si cu a nuam tuk. Cu bantuk te cun midang kan dawt hna tikah midang an i nuam ve. Cucu kan Bawipa Jesuh Khrih nih tuah hna seh ti a kan duh bikmi cu a si. Phundang in kan chim ahcun, midang cungah thatnak kan tuah khawhnak ding cu an cungah dawtnak kan ngeihmi thawngin a si lai.

Cucaah, ka dawtmi ka u le ka nau hna, Khrihfami nih zeidah kan i tinh lai? Zeitin dah kan nun lai ti fiang ngai in a kan cawnpiaktu cu Jesuh Khrih nih a kan cah takmi "Mi nih kan cungah tuah hna seh ti nan duh bantuk khan midang cung zong ah va tuah ve u" ti hi a si ko. Midang cungah thatnak le dawtnak a langhter kho tu kan si nakhnga, kan biakmi Pathian nih thluachuah kan pe cio ko seh. Amen.

FA LE CAAH NU LE PA KAN BIAPIT NING

vawikhat cu mifir pa kha thil a fir ruang ah an tleih i thawng tlak ding a si. Mahlio ah cun mifir pa nih ai thawh i keimah thawng nan ka thlak dingah cun kanu le kapa zawngthla ve hna uh tiah a ti hna ti si. Biaceih bawi nih zei ruangah dah na nulepa cu kan tlak ve hna la tiah a vun hal tikah. Mifir pa nih leh mi cu. Pa hngakchia kasi lioah siangin khedan (Pencil) ka fir culio ahcun kanu le kapa nih an theih ko nain zeihmanh an chim lo. Ka vun pehzulh lengmang i hi dir hmuntiang kaphak nak asi. Curuang ahcun thlak veding ah an i tlak veko a ti hna ti si.

Mahnih a ka cawn piak mi cu. Hngakchia hi duh thimnak pek lengmang ah a tha. Asinain duh thim ningchimh loah cun rawhral nak an phan theotawn. Nulepa cheukhat cu kan fale an i lawmhnak a si ahcun tiin, an tuah mi thil khazei asi kan chimlem hna lo. Kanruah awk a si mi cu zeinih dah kan fale a lawmh ter hna, chiatnak nihmaw a lawmh ter hna thatnak nihdah a lawmh ter hna ti kan tuah lem tawn lo. Khawi kain dah lawmh nak an hmuh timi hi tuak piak peng hna an hau. Midang lung fak nak pek kha kan fale nih an i lawmh nak a siah cun mah kha ning cang lo lawmh nak a si caah kan hrial ter hna awk a si. Hngakchia cu an thinlung nih a duh ning le an hmuh mi ning poh in um an duh tawn. Cu tik ah thil tha lo lei i kal pial an i timh tik ah nulepa nih a si khawh chung in kan chimh hna ding a si. An duh nak hawih poh i kan zulh hna ahcun an u pat tik ah nulepa ngeihchiat ter tu le lungretheih nak pe tu an si tawn. Thil sual khuasual an va tuah tik ah cun a ho dah a min chia tiah cun nulepa tthiamtthiam kha mawhchiat nak phur tu cu si a si tik ah kan fa le a chimh cawnpiak ziathiam hna usih.

A buaktlak cun fa le chimh cawnpiak hi cu nu rian deuh hei ti ko u sih. Raltuk minthang Napoleon nih a chim mi cu France ram nih a chambau bik mi cu nu a si a ti zei dah a chim duh. Fa le hrangah nu le an bia pit nak a chim duh mi a si. Kan fa le kum 4 kum 5 an si lio tein tha te chimh cawn piak ding an si, khi lio can i thil an theih mi khi an nun chung an i nun pi ding lio can te a si ti si. Khi lio can khi an biahal a pang cu tik ah tha tein leh hna ding an si, an hal mi poh lung sau tein thinhung lo tein leh peng ding an si. Vawikhat cu Napoleon le Balcombe lam an leng culio ah cun hngakchia an hnawm taktak mi an hmuh ti si. Cu ahcun Balcombe nih a thawh i hi hngakchia hi cawnpiak a hau ve aw a tiah a ti ti si. Cuah cun Napoleon nih a thawh i, hi hngakchia hi cawnpiak a haulo, a cawm tu anu le apa tu cawnpiak an hau tiah a ti ti si. Zeidah a chim duh ti ahcun a nulepa nih an chim cawn piak lo tik ah mah tiang dirhmun a phanh nak a si ti kha Napoleon nih a fian tuk caah a nulepa tu cawnpiak an hau a ti nak cu a si. Nulepa nih hin kan fa le hi an len lai siseh zei an tuah ding mi poah ah kan theih hna ding hrimhrim a si. An len an lawi bak in ka fa tu chun zei ban tuk dah na tuah tha te in hal ding, cheukhat nu le pa cu kan fa le nih zu maw va maw thil dangzawng an van chuah pi tik ah ka fa na thawn ning cu tiah kan fak tawn hna. An thil put mi le an chuah pi mi kha khawi ka zawn i an lak mi si an mah kut ke te i an hmuh theih mi maw si, ti mi kha tha te in hal ta hna ding an si lawmh thawrh in lawmh ding an si lo. lawmh piak ziathiam an hau,cu caah cun nulepa nih kan fa le hi a chimh cawnpiak ziathiam cio hna u sih. Kan fa le hrang ah nulepa kan bia pit zia hi pa khat cio nih philh hrim hna hlahsih.

NU LE PA HNA NAN FA LE KHA AN ING PUANG TER HNA HLAH UH

"Hngakchia hna, Khrihfa nan si caah nan nu le nan pa kha upat hna u, cucu Pathian lawmhmi thil a si. Nu le Pa hna, nan fale kha an ingpuanter hna hlah u, an lung a dong sual lai.” (Kolossa 3:20-21)

Kan fala hna cu a ra lai ding mi chan ah nu le pa ding, hruaitu ding , cawnpiaktu ding, miphun kil vengtu ding, hi kan vawlei pi a zoh khenhtu ding an si. Zeitindah kan zohkhenh kan cawm ken hna ti mi nih hin a phi a chuah ter lai.

Nu le Pa hna nih fale hrang ahhin tinh piak cem mi cu fale lung dongh ter lo le ingpuanter lo in ruahchannak he khahter hi a si tawn. Mi zeibantuk Nu le Pa hmanh nih an fale te hi ruahchanak nganpi he an tinhpiak mi hna lam hi tlinter an duh cio. Cu ruangah cun hi ka zawn ah Paul nih Kolosa i a um mi Nu le Pa hna ralrinnak a pek hna, “Nu le Pa hna, nan fale kha an ingpuanter hna hlah u, an lung a dong sual lai” a ti. Nu le Pa tampi cu Khrih tel lo in an fale hrangah fimthiamnak cawn hi hmailei an nun khuasak nak ah an cawnpiak tawn hna, fimthiamnak sang an cawn tik ah an rian, an lahkhah a tha taktak, a nun an i nuam tawn ko, sihmanhsehlaw fale hna caa a thiam lomi hrangah teh, cu ti i Nu le Pa nih forhfial an si tikah an ing a puang i, an thinlung a fak tawn. Rumnak duhnak, Thiam sannak, Fimthiamnak te hna hi hngakchia hna i an goal a si awk a si lo, sihmanhsehlaw Nu le Pa hna nih hram hram loin hnek an si tawn.

Nu le Pa hrim hrim nih hin Pathian an theih i, an fale hrang zongah Pathian theih hi pakhatnak a si awk tu a si. Fale hna nih an i ruahchannak cu Pathian ah a um awk a si i, Pathian duhnak in an nun i, Pathian duhnak zulh in an tthan awk tu si. Nu le Pa hrimhrim nih an pahnih an i dawtnak le Pathian an dawtnak langhter in, an fale cu dawtnak he an zohkhenh ve hrimhrim hna awk a si. Nu le Pa hrim nih fale hrangah umtuning, nunning, tuahding le zulhding pawl kha ser piak ve i, cu sermi cungah cun ri an khiah piak hna ding asi. Cu ri cu fale nih an lonh ahcun ai tlak ning in dantat ve ding.

Cu ve tthiamthiam bantuk in Paul zongnih, “Hngakchia hna, Khrihfa nan si caah nan nu le nan pa kha upat hna u, cucu Pathian lomhmi thil a si,” a ti. Sihmanhsehlaw, cu tiin hngakchia hna nih upat ding cu nu le pa tavuan ah um. Nu le Pa hrim hrim nih cawnpiak a hau mi si, cu lo cu hngakchia nih cawnpiak lo le chimhrin lo cun zeitin dah upat dan cu an hei thiam hna. Sunday School i saya/sayamah te nih an cawnpiak hna nak lawng in a zaa hrim hrim lo, Nu le Pa hrimhrim nih inn le lo ah ni chiarte cawnpiak hau mi hngakchia kan si. Nu le Pa hrimhrim nih Sunday School ah zeidah an cawnpiak hna ti zong kan theih hau, inn chungkhar zongah nifa te cawnpiak an hau. Nu le Pa hna nih cutin fale te Pathian kong le nun chimh ansi tikah, Pathian an upat zong asi i, fale te an upat hna zong a si. Cu ti cun nu le pa, cawnpiaktu, miphun hruaitu an si tikah, hmailei a ra dingmi chan ah hi vawlei ceunak an si lai.

Bawipa, Nu le Pa hi fale hrangah nangmah muisam kengtu an si bantuk in, nangmah hrimhrim hi an nun ah rak i langhlaw, thuk chinchin le kau chinchin in an in theih i an in dawt i, fale hna nih nu le pa muisam ah nangmah kan in hmuh peng nak hnga an nun ah rak i langh peng ko.

MITTHLI TLAK A UM TI LAI LO

"Mitcaw tiah ka phai hlah u, vancung ka Pa sin ka phak tikah cun ka mit taktak ka au cang lai. Khi tikah ka Bawipa ka hmuh lai. Sui in phahmi lam dawh ah a vanmi thiang hna he dong loin ka leng lai. Cuka ahcun hnachetmi hna hmanh nih Jesuh aw an theih cang lai I kebei zong an kal kho cang lai. Pum tlamtling lo ti a um ti lai lo. Vanmi bantukin aa dawhmi taksa in thuamh kan si cang lai I a thi kho ti lomi pumsa, tlam a tlingmi pumsa kan ngei dih cang lai" tiah mittcaw hlaphan thiam Fanny Crosby nih a chim.

Cucu zumtu hna kan si te dingmi a si. Lei kan harnak hna hi kan philh cang lai. Khi tikah ahcun ruakkuang ser a um ti lai lo I thlankhur cawh a hau ti lai lo. Cucaah pei Isaiah nih maw mi vialte hna hihi hngal tuah u "Miphun vialte cungah minmei bangin a zammi ngaihchiat mitthli tlaknak hi a ttianter lai. Bawipa nih thihnak cu zungzal ca in a hrawh lai. Mi vialte cu an mitthli a hnawh hna lai...cutikah lunglawm in kan um lai I kan tha nuam lai" tiah, zumtu mi hna khuasaknak ding hmun cuanh in a rak chimchung (25:8-9) kha. Cun zeitindah a chimchap tiah cun, "ser tharmi hmun nuam ahcun lawmhnak a khat lai. Ttahnak a um ti lai lo I bawmhnak hal zong a um ti lai lo, thihnak a um ti lai lo" a ti (65:19-20).

Hlaphuah thiam nih cun hitihin a phan. "Tthennak vawlei, duhtlin lonak ram in van Zion  kan panh lio ah harnak phun kip le ttahnak kan tuar. Zun ngai in kan hram, zawtfahnak phun kip kan tuar, mangttam kan tong I, sifak ngakttah buangro, mirum milian le rethei kan I thleidang I mihrut mifim ti'n kan I zohchuk. Sihmanhsehlaw khi hmun ahcun cu bantuk cu a um ti lai lo. Zawtnak nih a kan tlunh ti lai lo caah siibawi kan herh ti lai lo. Khrih tu kha kan siibawi a si zungzal cang lai. Cun sungh zatlak a um ti lai lo I mirum milian le mihrut mifim thleidan a um ti lai lo. A vanmi thiang hna bangin Zion khuadawh hmun nuam ahcun kan leng cang hna lai. Khrih tu kha van hla sa in kan thangtthat cang lai. Cu hmun cu kan cuan I phak lai kan hngahhlang tuk cang a ti."

Johan zong nih khuadawh hmunnuam Zion ahcun, "Ttahnak mitthli vialte kha a hnawhpiak dih hna lai. Thihnak a um ti lai lo, ngaihchiatnak le ttahnak le fahnak zong a um ti lai lo. Thil hlun vialte cu an lo dih lai a ti." Cu hmun phak lai cu a ngaih tuk caah Jesuh ra ko cang tiah a ti chap (Rev.21:4; 22:20b).

Nang le kei kan dirhmun van I purhdap ta sih. Johan cu ai manh tuk, ai ready tuk cang. Kannih ta kan I ready cang maw? Jesuh nih nan umnak ding inn remh ah ka rak kal chung lai nain nanmah tthit awk ah ka rak ra tthan lai a ti. Cu a kan remhpiakmi hmun cu mitthli tlak a um ti lonak hmun cu a si. Amazing Grace timi hla phuahtu John Newton nihcun, "Khi hmun ah a donghnak bik khuaruahhar thil pathum a um lai. Vawlei ah anih hi cu vanram a kai lai lo na timi kha mitthli tlak a um ti lonak hmun vanram ah na hmuh lai I, vanram cu amah ta bak si, a kai hrimhrim lai na ti mipa kha na hmu te lai lo. Cun a donghnak bik khuaruahhar cu nangmah or keimah vanram ka/kan kai kha khuaruahhar hmahnung bik cu a si lai" ti.

Cu hmunnuam phak dingin I timtuah cang hna sih. Zeicahtiah cathiang nih a rau ti lai lo a ti.

THIANG THLARAU & TUKFORHNAK AN I DANNAK

Tukforhnak:
Tukforhnak hi a rak tthawng taktak ve. Pathian he pehtlaihnak kan ngaih deuhah tukforhnak cu a tthawng chinchin ve. Ahleikhun in hrinthar nun a co cangmi hna sin koah a tthawng. Zetindah Pathian he an ipehtlaihnak  hri ka chah lai I, an chungah a nung mi  Thiangthlarau cu ka chuahter lai ti kha aa zuam. Tukforhnak kan tei khawh nakhnga caah a zungzal in thlacam kan herh. Thiangthlarau nih fim a kan chimh tikah, tukforhnak nih cun zeitindah ka hrawh khawh lai ti kha aa zuam caah, cu Thiangthlarau nih fim a kan chimhmi ( ralrinnak ) cu kan ngaih a herh.
Suallam ah voikhat an kalpi ( pilpi ) ahcun lungdiriam loin, an tuah lai I, a voi 2nk vai I nolh ding khan aa zuam tthan lai. Atute lawng an ti lengmang lai I, za dok za lo dok in an chiah lai I, suallam ah pil ding cun an tukforh peng ko lai. Duhsah tein an lem lai I an lemnak na zulh ko cun, a dih donghnak cun, khur chungah an thlak ko lai..

Vuleicung thilri nuamhsaihnak vialte kha an hmuhsak dih lai. Kha tikah amah na zulh ko ahcun, na nun cu thi lakin khur chungah an thlak ko lai. Hrintharnak nun a co cangmi hna nih cun, kan cungah tukforhnak, vulei thilri nuamhsaihnak, bible he aa kalhmi paoh kha kan hrial a hau. Voikhat an pialpi cun, a voinak cu, na fawi deuhnak in lam a kawl rih  lai, apoi lo atute cu, an tuah cio ko, tiah bia an chimter lai I, a za cang a ti tikah an merh lai I, harsatnak, ngaihchiatnak, thil ttihnung phun zakip kha na cungah a tlunter lai I, na nunnak tiang hmanh a dih ko lai.

Thiangthlarau:
Hrintharnak na co bakin, thiangthlarau  nih na chungah rian a tuan colh I tuah ding le tuah lo ding thleiden thiamnak kha an pek. Thiangthlarau in kan khah khawh zungzal nakhnga caah a zungzal in thlacam le bible thiang kan rel peng a hau. Kan pum kha thianhlimnak in kan khahter a herh. Na pum nih sualnak a tuah lengmang ko ahcun na chungah can hmante in rian a ttuan lai lo. Na pum chungin a chuah hmanh an chuahtak ko lai. Hrintharnak a co cangmi nih sualnak kan tuah tikah thiangthlarau nih tuah hlah tiah a kan chimh cawnpiak rih. Cucu cawnpiaknak cu zeibantuk hna dah an si, sualnak na tuah lai ah, ttihphannak in an umter lai, na caah a ttha lo, Khrih Jesuh nih a kan dawtnak hna kha na mitthlam ah a run cuanter lai. Bibile ca thiang hna in an hmuhsak lai, ralrinnak a phunphun in an pek lai. Kha I na pah  chih rih ko cun, a dihdonghnak cun a kal hmanh an kaltak ko lai.

Khrihfa ka si tiah aa timi poah hin hrintharnak nun an co lo. Biakinn ah a kal lengmang I a hla thiang a sa lengmang mi paoh hin hrinthar nun co ti a si lo. Mi tthen khat nih, Jesuh Khrih cu kan caah vailam ah pei a thih cang cu, a thisen in a kan tlanh cang, Jesuh Khrih cu a ka dawtu le a ka khamhtu a si, cuhleiah zeidah hrinthar cu a herh ti an ti tawn. Kaa lawngin kan chim I, kan cohlan lo cun cucu hrintharnak na co a si hnga lo.
Thiangthlarau nih na chungah rian a ttuan lo cun, cucu khrihfa sawhsawh na si ko hnga! Khrih nih fa ah cohlanmi hna cu, thiangthlarau nih a umpi hna I, an chungah rian a ttuan.
Mi tthen khat cu khrihfa kan iti I, ka hrinthar le hrin thar lo kai thei lo, atu ahhin, thi ninglaw vanram ka pha bal lai lo dah tiah a timi hna kan um. Hrintharnak na co le co lo cu, thiangthlarau nih na chungah rian a ttuan maw ti kha nai check hau. Pathian nihhin, hrinthar nun kan ngeih khawh nakding caah, thil pa khatkhat hna in a kan kawh. Crusade le camping tuahnak lawngin hrinthar nun co a si lo. Jesuh he cun khoika hmunhma poah ah iton khawh a si ko. Hrintharnak na co khawh nakhnga caah, thil pakhat khat in Pathian nih an kawh auh khawh.

Zungzal a nung dingmi kan thlarau kan sungh nakhnga lo caah, a zungzal in thla kan cam le cathiang kan rel a hau. Nifatin thlarau tirawl kan ei a herh. Thiangthlarau na tin co rih lo  asi cun, thla a zungzal in cam law bibile thiang rel khawh lengmang izuam. Pathian sinah thiangtharau na tinco khawh nakhnga bawmhhal. Zumtu mifa le kan iti ttung I thiangthlarau nih kan chungah rian a ttuan lo cun, cucu a deu zumtu kan si ko hnga!

Note: chirhchannak bible cacang tete ka rak thil chih lo. Hihi hmuhtonmi chungin langhtermi deuh lawngte an si.

Areltu nan dihlak  Pathian vel le deuhnak cu nan cungah um cancin ko seh. Thiangthlarau a tingco rih lomi nih tinco khawhnak le a tingco cangmi hna nih thazaang ilaknak ah cang hraam seh. Amen….

ZEI NA TON POAH AH BAWIPA CU THANGȚHAT KO

Kan Pathian cu zumh awk a tlakmi Pathian a si, kan thlacamnak a lettu le a thei dih tu Pathian a si cucaah Pathian a tthat ruangah a zungzal in thangtthat dingin kan sawm hna.

1 Thesalon 5:16-18
"A zungzal in i lawm u, a zungzal in thlacam u, zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna."
Amen

Khrih ah dawtmi ule nau hna hna, nan dihlak in nan kut kan tleih hna. A tlangtar ah nan hmuh bangin "Zei na tonmi paoh ah Bawipa cu thangtthat ko" tiah ka rak tar.
Nifatin te kan nunnak ahhin harnak, ngeihchiatnak le lungretheihnak kan tong ko lai. Kan rianttuannak ah siseh, kan sianginn kainak ah siseh, si lo le inn kan um sawhsawh nak te hna le kan i chawhvahnak ah stress le buainak ttukttek kan tong peng ko lai, cun kan duh lo ning in thil a kal caan zong a tampi ko lai sihmanhsehlaw kha caan hrimhrim ah khan Bawipa sinah lawmhnak bia chim khomi fanu fapa si dingin kan sawm hna. Keimah zong ka minung sinak in ka tlinh hrimhrim lo, harnak caan ahhin Bawipa sinah lawmhnak bia chim loin ka zai hi a tam deuh nain kai fianmi cu lunglawmhnak le khua awng kan pemh caan lawngah Bawipa thangtthat ding a si lo ti hi a si. Kan thlacamnak a kan leh le kan duhmi a kan pek lawngah thangtthat ding a si fawn lo. Bible ca chungah kan hmuhmi cu "zei bantuk thil nan ton hmanh ah lunglawm in um u" ti kha a si. Kan nunnak hi i check hna usih law, harnak caan le ngeihchiatnak caan ah kan i lawm i Pathian kan thangtthat kho maw ti hi a si.

Israel mi pawl kha Pathian nih Moses hmangin Kanaan ram ah hruai a timh hna cun thluachuahnak nganpi a chiahpiak hna. Egypt ah sal an tannak in Kanaan khua cu ni 40 te lawng kal a si, sihmanhsehlaw Israel miphun kha an phunzai tuk caah kum 40 chung thetse ram car ah an vakvai. Cu ve bantuk in kannih zumtu zong nitin kan nunnak ah Pathian hi kan halmi a kan pek lawngah kan thangtthat i kan cawnglawmh tawn, cucu a si ding a si lo, Pathian nih hin sualnak na tuah ah in hlaw sehlaw tthatnak na tuah lawngah a hmai in chit sehlaw zeitin na um lai? Cucaah zei bantuk thil kan ton paoh ah i lawm usih law Bawipa cu thangtthat ko hna usih. Kan phunzai tuk belte ahcun Pathian nih a kan chiahpiakmi thluachuahnak kan co kho lai lo.
Tuni ah thazaang rak i lak ve ti kan duhmi hna cu: harnak, ngeihchiatnak, lungfahnak, sunghnak, awnnak, na duhning in a kal lo caan zongah siseh na retheih caan zongah siseh, Bawipa cu thangtthatnak pe law, amah cu i bochan law na ruah lo leng in Pathian nih thlua an chuah lai i lam an hruai lai.

Reltu vialte Bawipa nih thluachuahnak dong cat loin inpe ko hna seh!
Amen.

MIDANG NGAIHTHIAM

Midang ngeihthiam hi a micheu kan caah cun a rak har tuk. Zeiruang ahdah midang ngeithiam a hauh? Zeitindah kan ngeithiam hna lai? Bible nih tampi a kan cawnpiak…

Midang ngeithiamnak cu midang ca lawng si loin kanmah kan Thlarau tthanchonak caah a tthahnem mi a si. Pathian cu dawtnak a si bantuk in kan nih zong Amah he i loin kan nun tikah ngeithiamnak hi hrial khawh a si lo. Keimah nih hrilhfiah tampi hau loin Bible ca cang tete tu in van langhter ka duh.

1.Misual kan si ca’h midang kan ngeithiam hna awk hrim a si - Matthai 6:14-15
“Mi nih nan cungah an tuahmi ṭhat lonak kha nan ngaihthiam hna ahcun, vancung i a ummi nan Pa zong nih an ngaihthiam ve hna lai. Sihmanhsehlaw mi ṭhat lonak kha nan ngaihthiam hna lo ahcun vancung i a ummi nan Pa zong nih ṭhat lonak nan tuahmi kha an ngaithiam ve hna lai lo.

Kolose 3:13 - Pakhat le pakhat lungsi lonak nan i ngeih tikah pakhat le pakhat i ngaithiam u law i bawm u. Bawipa nih an ngaihthiam hna bantukin pakhat le pakhat nan i ngaithiam lai

Efesa 4:31 - Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u.

2.Midang ngeithiam tthan ding in I tim peng - Matthai 18:21-22
Cun Peter cu Jesuh sinah khan a ra i, “Bawipa, ka unau pakhatkhat nih ka cungah sualnak tuah seh law voi zeizat dah ka ngaihthiam lai? Voi sarih tiang maw?” tiah a hal. 22Jesuh nih cun, “Sihlah, voi sarih si loin voi sawm sarih voi sarih,

3.Dawtnak nih Lam an hmuhsak lai - 1 Korin 13:4-6
Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa porhlaw lo. 5Dawtnak cu tlabulbal in khua a sa lo i amah zawn lawng aa ruat lo; a thin a tawi lo, palhnak kha aa cinken peng lo. 6Dawtnak cu midang sualnak cungah khan diriam in a um lo, biatak tu ah khan aa lawm.

Nangmah kha ngeithiam na si ve nakhnga midang va ngaithiam ve cang. Dawtnak nih lam an hmuhsak lai i ngeihthiamnak na hmuh lai.

Reltu vialte Bawipa nih mi ngaithiam khawhnak lungthin inpe dih ko hna seh!

Amen.

TIMH CIA TEIN NA UM CANG MAW?

2Peter 3:10

'Sihmanhsehlaw Bawipa Ni cu ruah lopi ah mifir bantukin a ra lai.'Tuzaan ah Bawipa nih kapi, a salnu hmangin cathiang a relmi nih fak tuk in a ka cawnpiakmi cu.
Mifir cu mitheih lo lio te ah khin thil a fir. Bawipa Jesuh Khrih a rak rat tthan tik Ni cu cu bantuk in a si ve lai. Cu si ah te timhcia tein na um cang maw?

Vawlei na nun chungah mifir an tamnak ah na um lio ii mifir pa/nu nih zeitik ah ka inn ah a rat lai ii ka thil a zici mi pawl hi a ka fir piak lai tiin lungrethei in na um ii, inn na chuahtak paoh ttha tein na thil herhmi, biapimi vialte kha secure tein an hmuh khawhnak hnga lo na fim le na thuh ta hna. Hi bantuk tein na nunnak timhcia tein in le ralring tein na chia ve maw?

Kan nun caan hi zeitik a liam lai kan thei lo, Jesuh Khrih zong mifir bantuk in a rat lai caah ahohmanh nih a rat lai kan thei lo. Vawlei na taksa duhnak le na hakkauhnak hi kaltak dih cang hna kan sawm, hi kan nun caan tawite ahhin zeitluk in dah Bawipa caah ka nun ka pek lai ii zeitluk in dah Bawipa ka lawmhter khawh lai ti hi i zuam hna usih. Pathian cu thangtthat duh Pathian a si. Bawipa nih an dawttuk, Amah sinah um ve dingin an sawm Pathian fa le hna asinain atu lio na dir hmun hi i check tthan tuah. Bawipa sinah a tu na sining tein na phaan kho lai tiah naa ruat kho maw?
Bawipa nih a reltu nan dihlak thluachuah in pe ko hna seh.
Bawipa dawttuk mi fa kan si. (Efesa 5:1)

TEINAK CU BAWIPA TA ASI

Deuteronomi 31:8
“Na hmaiah a kalmi cu Bawipa a si; na sinah a um lai i an deuh lai lo i an hlaw fawn lai lo; ṭih hlah, na lung zong dong hlah,” tiah a ti.
“Teinak cu 100% Bawipa ta a si”
Israel miphun nih Moses le Joshua hruainak thawng in an dohmi ram paoh an tei dih hna, voikhatnak i an tei khawh lomi zong Bawipa an fuh i teinak an hmu tthan. Ral tampi doh in, harnak, fahnak, ngeihchiatnak, lungdonghnak, ttahnak le thihnak tiang hmanh an ton dih hnu ah an kal hnawhmi ram cu an co.

Hi ca a reltu unau na tinhmi kha zeipaoh va si ko seh, chimh kan duhmi pakhatte a um, Bawipa a nungmi Pathian i theihpi mi va si hram ko seh. Amah i theihpi lomi cu zeitluk rianttha zong ngeihchiatnak le lungretheihnak a phortu an si ttheu tawn.
Israel mi hna nih an ral an tei hnanak aruang le an i tinhmi an co nak a ruang cu:
1. Bawipa an sinah a um
2. Bawipa an i bochan
3. An lung a dong bal lo (a lung dongmi cu an thi)
Unau na tinhmi ruangah harnak le fahnak, ngeichiatnak le lungretheihnak a phunphun na ton ko lai, sihmanhsehlaw Bawipa kha sawm peng ko. Na lung hmanh kha a dong ko hnga, sihmanhsehlaw Bawipa i bochan ko mu an deuh hrimhrim lai lo. Bawipa na cungah a lung a dongh bal lo bantuk in zeitikhmanh ah na lung dong ve hlah mu. Na lung dongh ahcun na tinhmi cu chim lo na tinhlo mi hmanh na co lai lo. Na tei hnga ding mi na ral le na co hnga ding mi na tinhmi cu na tei i na co khawhnak hnga “Teinak cu 100% Bawipa kan Pathian ta a si.”

Reltu vialte Bawipa nih thluachuahnak inpe ko hna seh!
Amen.

Khrih Chungah Zeitindah Thawng Ngai-in Kan Nun Khawh Lai?

Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw? (Filipi 2:1)

Pathian nih zumtu hna a kan pek mi hi Khrihfa tampi nih nun duhdim ngeih nak dingah kan hmang lo.Pathian pek mi kan hngalh lo caah maw,asilo ah a hmanning kan thiam lo caah a si kho men.Mi pakhat nih Bank ah phaisa(ro) in chiah piak seh law, na leiba caah na thin a phang a herh lo.Bank ah phaisa chuahnak ding kong tu ah na buai ding a si.Pathian pek mi thil kan ta a si ko bu ah a laak le a hman kan thiam lo ahcun kan caah san a tlai lo.Cu caah Khrih chungah thawng ngai le duhdim tein kan nun khawh nak hnga kan hrampi ca i Pathian nih a kan pek mi thil 4 in langhter ka duh.

1.Thlacamnak.  ( 2 The 5:16)
     A zungzal in Bawipa Pathian he i chonh kan herh.A mah Pathian fial mi a si. Pathian he biachonh lo( Thlacam lo) ah cun nifate hman tein nun khawh a si lo.Tukforhnak kan tei lo nak a hrampi hi thlacam daihthlang ruangah a si.E.M.Bounds an ti mi pa nih Pathian caah minung biachim hi thil lianngan ngai a si,cu nakin a lianngan deuh mi cu minung caah Pathian bia chimh/chonh hi a si a ti.Thlacam lo mi Khrihfa an um ahcun khuaruahhar ngai awk a si a ti.Kan cathiang chungah nawlnak thlacam piaktu( intercessor) pakhat hmanh an um lo caah Pathian a khuaruah a har a ti ve.( Is 59;16 )Tlawmte long thla na cam ahcun tlawmte long Pathian rian na tuan a si.Zeitlukdah Pathian rian kan tuan ti theih na duh ahcun zeitlukdah thla ka cam ti mi kha tahnak fung a si.Thlarau lei  thanghnak ti mi hna hi thlacamnak theitlai an si.A rian na tuan ngai ko nain thla na cam lo ahcun Setan duh zong te a si i na hma a kal lai lo i thawng ngai in na nung khawh lai lo.Thlacam deuhdeuh,tangdor deuhdeuh,Pathian he naih deuhdeuh,daihnak hmuh deuhdeuh a si.Pa thian hi a kut kawl lo in a mithmaitu hi rak kawl deuh ding a si.

2.Pathian bia rel le cawn.( Joshua 1:8)
     Khrihfa le Bible cu aa then kho lo.Nifate Bible rel hi Khrihfa mi kan philh khawh ding a si lo.Bible cu kan lam le kan ceunak a si.Job nih " nifa ka herh mi rawl nak in Pathian hmurka in a chuak mi bia kaa khon deuh a ti.Job 23;11-12 ).Pathianbia na duhlo ahcun na thlarau ngan a dam lo,asilo ah Khrih thlarau na ngei lo a si kho.Pathianbia tampi na chungah na khon ahcun Pathian umpinak tampi na nun ah a lang ve lai.Bible lo in Pathian biak cu hriamnam lo in ral doh he aa lo. (Ef 6;17)Pathianbia rel le cawn a hau lo ti mi ruahnak hna hi a hmanlo mi ruahnak a si.Pathianbia (Bible) na dawt i na upat hi Pathian na dawt le na upat a si.

3.Harsatnak(Hneksakank)( Jem 1:2-3)
     Harsatnak hi kan zumhnak le a nawl kan ngaihnak nun lei ah kan than nak lai Pathian onh mi an si tawn. Jame 1;2 ah harsatnak nan cungah a tlun ahcun i lawm ko u a ti.Kum zabu 19 lio i Englandram i phungchim minthang Charles Spergeon nih " na innka kaupi in ong law harsatnak a rat a si le rak lut bai,ka Bawipa nih pei an thlah fam cu " tiah nan ti lai a ti.Job 23;10 ah " a ka hneksak dih tikah suithiang ka si kha a lang" ati.Jonah nih a ton mi thlichia kha a caah tihnung ko hmanhsehlaw Jonah nun chimhtu le Pathian lei a mer tertu a si.Cu bantukin zumtu nih kan ton mi thlichia hna hi Bawipa lei a kan hruaitu le Bawipa mui a kan hliah tertu an si tawn.Kan ton mi harsatnak hi Pathian nih tinh mi a ngei caah a si ti theih fiang hna u si law vuivai lo tein Pathian hal buin hngah zia thiam hna u si.Mah belte hneksaknak le tukforhnak hi a mui hliah a herh ngai.Tukforhnak cu a tha lo mi thil zei maw he sawm phun khi a si i zam tak ding,hrial ding le doh ding a si.Tukforhnak cu Pathian sin in a ra mi a si lo.(Jame 1;13-14) A mui kan hliah hnu ah hneksaknak a si ahcun tuar ding,ingding a si i cu chungin kan luat nakhnga Pathian hal buin hngah ding mi a si.Thei tampi kan tlai nak hnga thenh kan si i i lom ding a si.

4.Chung ummi Khrih: Kan nunnak (Ef 3:17 )
     Zumtu tampi kan chungah Thiang thlarau a um kan theih ko nain Zisuh a um kan theih ti lo.Zumtu hna hi Khrih hnu zulh long hi a si lo,Khrih bantuk in nung ti long zong a si lo.Khrih kan chungah a um i a mah lila hi kan thawnnak a si ti kan theih a herh.Khrihfa nun cu Chungum Khrih nun kha lengah langhter a si.Zisuh Khrih hi zumtu tampi kan chungah khual bangin a um.Kan nun Bawi thutdan cungah a thu lo.Kan nun ah Bawi a si lo.Cu ruangah thawng ngaiin kan nung kho lo.

Bia tlang kawmhnak:    Kan Bawipa Zisuh Khrih chungah Thawng ngai le duhdim tein kan nung khawh nak dingcu nifate thlacam,Bible rel,harsatnak ton khawh le Khrih kan chungah Bawi siter hi a si.Cu thil kan cungah a tlin khawh nak lai vailam ah Khrih he kan thi cang i tu kan nun cu Khrih a si a ti bangin kan nun Bawi thutdan ah Zisuh thu cang seh.law kanmah ah Zisuh cawl cang seh Kan nun ah Bawi si cang seh. Cu tik longah thawng ngai le duhdim tein kan nung khawh lai.

Bawipa nih thluachuah kan pek piak hram seh.